讀者殺人事件（下）
上集：https://bit.ly/2H3KK4U
點知兩個月後，我再次收到陌生訊息：「你嘅教材，我已經準備好。」
「你知唔知，個肚俾人捅咗一刀，係唔會好似電視劇咁，大聲慘叫。
我一刀捅入去，佢好驚，會出聲但氣若遊絲，好似用喉嚨呼氣一樣。
然後我將兩隻手指插入去個刀口度，轉咗一圈，佢先開始歇斯底里咁嚎叫，痛到成頭都係汗。
我估，啱啱被捅嗰陣，個腦係一片空白嘅，根本大叫唔到……人體係咪好有趣？」
我望住呢個訊息，我對手係咁震。
傑傑真係殺咗人？佢為咗「教」我寫小說而殺人？咁我係咪變相害死咗一個人？
我想回覆，我想問佢，我想鬧佢，我打咗幾個字，但完全組織唔到。
我仲未覆佢，佢就Block咗我。
我成晚都喺度諗，到底傑傑係嚇我，定真係殺咗人？如果佢殺咗人，有幾多係因為我？我應該點樣阻止佢？
無數個念頭喺我腦海中盤旋，我完全瞓唔著。
第二日，我不斷睇訊息，好似等緊傑傑發訊息畀我，等緊……一種宣判。
又係一個陌生信息：「係咪好心急呢？個女人中咗一刀，都冇死到，哈哈，咁就用佢教多你一堂。
今日學『火燒』，佢戴咗一對好大嘅耳環，好似地鐵扶手咁。
我用力扯佢隻耳環，佢隻耳仔變晒型，痛到嘩嘩大叫。
然後我點火，燒佢隻耳仔，佢痛到成身抽搐，連對眼都變埋型，呢啲先係真痛。
之後火由耳仔燒到落塊臉度，熄咗火之後，佢塊表皮好似糖紙一樣，甩咗一半，可以輕而易舉咁撕落嚟……」
我控制唔到自己隻手，我居然上網search燒傷嘅圖片。
我忍唔住諗，有一個女人，因為我而俾火燒，即將面臨死亡……
更可怕嘅係，冇幾耐我收到一個快遞，箱裡有一隻微焦嘅大耳環。
我終於拎到證據，我即刻拎住隻耳環去報警，話耳環嘅主人被禁錮虐待。
但我講唔出隻耳環屬於邊個，只有一隻耳環，就算想驗DNA都搵唔到對象。
單憑一隻耳環，同查唔到IP嘅陌生AC，根本捉唔到傑傑。
我可以收到快遞，證明傑傑知道我嘅哋址。
如果佢覺得我「屢勸不聽」，下一個拎嚟做教材嘅，會唔會係我？
呢種壓力令我就嚟窐息，我開始同朋友一齊去做GYM，想練大隻啲但又練唔成；夜晚返屋企，會以為有人跟蹤我；為數不多嘅頭髮都愈甩愈多。
我直情想屈服，我想照住傑傑嘅描述，寫一個足夠恐怖嘅故仔。
但寫到一半，我又開始驚，驚自己寫得唔好，傑傑再捉另一個「教材」嚟教我。
我又驚自己寫得太好，寫完刀傷同燒傷，傑傑希望我寫更多種唔同嘅虐待手法，所以再搵個教材……
壓力太大，令我無所適從，我約咗個朋友出嚟傾訴，一五一十講晒件事出嚟。
朋友聽完之後都呆咗：「呢個讀者真係好恐怖！」
呢句說話令我成個醒晒，我忽然意識到，傑傑本身，就係最恐怖嘅故仔！
我將呢件事寫晒出嚟，出咗呢個故仔之後，直到依加，我都冇再收到傑傑嘅訊息啦。
其實，傑傑想做嘅，根本唔係教我寫恐怖故仔。
佢根本係一個Attention Seeker，佢想我承認，佢就係最恐怖嘅人。
隔住一層肚皮，好多人都唔會承認自己嘅真正目的。
隔住一重網絡，咩事都有可能發生。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #讀者殺人事件
Search